الديفل أو ال muffler أو علبة الشكمان هو أخر حاجة راكبة فى نظام العادم بتاع العربية, وظيفته كتم صوت الموتور, لكن فى المواتير الكبيرة بيأثر على خرج الموتور, وبيأدى غرضه وهو كتم صوت الموتور.
الديفل فى مصر غرضه أنه يعمل صوت عالى وخلاص, وصوت عربيتك على قد ميزانيتك وحظك فى العلبة اللى هتشتريها, لأنك مستحيل هتجيب حاجة وتجربها قبل ماتركبها ولو معجبتكش ترجعها.
ببساطة أنت ممكن تنزل عند أى بتاع شكمانات وتقوله يشيلك العلبة خالص وتجرب صوت العربية من غيرها, هو كل اللى هيعمله انه هيقصها وخلاص, فيه ناس بتتمزج من صوت الموتور وهو خارج من ماسورة وبس, وده انت ممكن تعمله بأنك تقوله يشيل كل العلب ويخلى الشكمان ماسورة واحدة طويلة وخلاص, أو تشترى علبه شكمان ب 200 ل 250 جنيه من اى حد بتاع شكمانات وتخليه يركبهالك, وصوتها مش هيعجبك لأن العلب دى مجرد علبة وخلاص ومفيهاش أى تصميم أو أختراع, بدل ماتسمع صوت العربية مع الكبس هتفضل سامع زنة أو صوت بيز مستمر وبيزيد مع الكبس.
أنت ممكن تبدأ لو ممعكش فلوس أنك تخليه فعلا يشيلك كل علب الشكمان اللى موجودة ويخلى الشكمان ماسورة واحدة, وصوت العربية هيبقى عامل زى عربيات الرش, ولو معجبكش ممكن تبدأ تشترى علبة شكمان وتركبها ورا وتشوف النتيجة.
لو عايز صوت نضيف هتحط ميزانية مش أقل من 500 جنيه, سواء لعلبة أستيراد وده الأحسن, أو علبة شكمان وخلاص من أى محل كماليات عدل, وممكن تدخل فى 800 جنيه ولا حاجة وأكثر للحاجات النضيفة, أجرة الراجل مش هتحرقك وهتبقى بالحب
فمن الأخر, ممكن تشيل علب الشكمان كلها وتسيبه مع نفسه وهتسمع صوت فاجر, أو تركب علبة ورا وخلاص, أو تعمل الصح وتجمع الحلين على بعض, ويبقى الشكمان مفيش حاجة بتأثر على مرور الهوا جواه وصوت العربية طالع مباشرة من العلبة اللى أنت شاريها, وده أكثر حاجة هتأثر فيه هى العلبة اللى راكبة.
وطبعا لأننا أصلا راكبين عربيات بمواتير تعبانة الصوت مهما عملت مش هيبقى خيالى, مواتيرنا كلها أربعة سلندر ودى صوتها أصلا خرا.
طب فين المكان
ردحذف